في رمضان بس
بتلاقي المساجد مليانه بالناس بتصلي
هيا حاجه كويسه مقولناش حاجه
بس اشمعني كتير مبيعرفوش الصلاه الا في رمضان
في رمضان بس
بتلاقي بنات كتير اوي متحجبه
بس عشان صايمه
وبعد رمضان مابيخلص
بتلاقي كل حاجه بح
وترجع ريما لعادتها القديمه
في رمضان بس
بتلاقينا كلنا ماسكين المصحف
ومصرين ان انا نختم القرأن
والواحد بيزعل اوي
لو فات منه يوم مقرأش فيه حاجه
مع ان احنا في بقيه ايام السنه
يمكن مبنعرفش مكان المصحف فين في البيت
في رمضان بس
بتكتر المسلسلات وكأن الشهر ده شهر التلفزيون
وكأنهم متخصصين بس انهم يلهو الناس عن كل حاجه
الا المسلسلات والبرامج
مع ان معظم الناس ممكن مبتفرجش علي التلفزيون في
الايام العاديه
بس في رمضان بتلااقيها مدمنه وبتجري عليه
وتقولك نسلي صيامنا
في رمضان بس
بتكتر اعلانات السمنه والزيت
والعصير وووووو
وكأن الشهر الكريم شهر كريم يحب الأكل
وكأننا في الشهر ده
مبنعملش حاجه غير ان احنا بنصوم وناكل
ونشتري حاجات للمطبخ والتلاجه ونبضع طول الشهر
في رمضان بس
بتلاقي التلفزيون مليان باعلانات التبرعات
مستشفي 75
مركز مجدي يعقوب
مؤسسه صناع الحياه وجمعيه رساله
مؤسسه الحصري الخيريه
مركز الشفاء المصري
وغيرهم كتير اوي
وكأنه شهر شحاته
أوك احنا عارفين ان في ناس كتير محتاجه
وكل واحد بيعمل اللي عليه
بس عيب يتاجرو بأمراض الناس وحاجتهم
والله عيب وحاجه مستفزه جدا
احنا ليه فاهمين الشهر ده غلط
ده مش شهر اكل ونوم وبضايع ومطبخ مليان
ولاشهر مسلسلات وبرامج واعلانات
ليه بنعامل ربنا الشهر ده بس
مع ان ربنا طول السنه معانا
ليه منعملش كل الحاجات الكويسه اللي بنعملها فيه طول السنه
وكل اللي بنبعد عنه في رمضان نبعد عنه طول ايام السنه
ليه منعملش نقطه ومن اول السطر
يبقي رمضان ونمشي طول السطور علي اننا في رمضان بردو
ما ناخده بدايه ونمشي صح دايما مش صعبه يعني
ده اللي بحاول اقنع نفسي بيه
انها مش صعبه وان اللي عايز يبقي كويس ويقرب من ربنا
اكيد ربنا هايساعده
. فاللهم تسلم منا رمضان متقبلاً
