افتقاد

 ساندوتش ومج النسكافيه اللي بيقومني الصبح منعوسه

عشان خاطر افطرك قبل ماتنزل

 شوووب العصير بعد العصر اللي بتطلبه وتشربه لوحدك

 الميا اللي لو سخنت شويه جنبك لازم نحط غيرها

التكييف اللي باب الاوضه دايما مفتوح وهوا شغال ودايما تتخانق معانا بسببه

وبردو بنسيبه مفتوح

اتصالاتك كل ربع ساعه عشان تصحيني من النوم 

حديث كل يوم بالليل اللي بيبقي فيه ملخص اليوم كله

ونم علي الناس كلها 

نكته بتقولهالي وهزار بالايد بتعصبني بيه 

 ضحكه بجد مش موجوده

وحشني علاقتك بجني وجريها عليك اول مابتسمع باب الشقه بيتفتح

بالمناسبه 

عن جني اللي اخدت اول خطوه ومشيت لوحدها لاول مره

وانت مش مشاركنا اللحظه دي

ومحتفظالك بيها فيديو وصوره

عن جني بردو اللي من يوم ماسافرت وانا حاسه ان عنيها تايهه

كان في حد مش لاقياه مع اني متاكده انك لما تيجي

هتبتدو صفحه تعارف من جديد لانها مش هتبقي فاكره

عن جني تالت مره اللي دلوقتي ودايما لما بتعيط وتقول بابببب وكانها بتنادي عليك

عن انا وانت وبيتنا اللي حسه انه مفتقدنا ومفتقد وجودنا فيها

وحشتني تفاصيلك وتفاصيل حياتنا سوا 

 وحشاني طول ماانت غايب

وحشتني اوي خلافاتنا ومعاكساتك ليا 

والاكلات العك اللي بقعد اجرب فيك وقلبي مبيطاوعنيش اعملها لحد غيرك

عشان محدش غيرك هايقولي تسلم ايدك ياحبيبي حتي لومش عجباه 

وحشتني 

تفاصيل

رغم ان بينهم بيبي 

ورغم ان حياتهم سوا بقالها سنين

لسه بردو بيتخانقو علي مين هاينام في طرف السرير

لسه بيتخانقو علي صوت التلفزيون العالي

لسه بيتخانقو علي مين هايرد علي التليفون 

لانه مبيبحبش يرد عليه حتي لو ايديها مشغوله ومش هاتلحق ترد

لسه بيناقرو في بعض 

وكأنهم لسه متجوزين من يومين 

وكأنهم لسه مش متعودين علي طباع بعض

بس بيلاقو دايما لذه في انهم يرخمو علي بعض

عشان بس بعد شويه يبصو لبعض ويضحكو 

ويحاول يحضنها وهي تستغربه اوي

وتحاول تتقل عليه بس بتضحكله ببساطه وكأن محصلش حاجه 

اصلهم بيحبو بعض اوي 

رغم صغر سنه وانه تقريبا قدها في السن 

دايما بتحس انه دماغه اعلي منها بمراحل

وانها لسه طفله بتتعلم منه كتير اوي

وبتفهم منه حاجات مش فاهماها

ورغم انه

في عيونها احسن راجل في الدنيا 

وانه اصلا بكل رجاله الدنيا كلها

لسه بردو بتهزر معاه وتتعامل معاه 

كأنه ابنها او حتي اخوها الصغير 

بتفرح اوي لما يقولها يابت 

كلامهم مع بعض لو حد سمعها

يلومهم علي طريقتهم سوا 

يقولهم خلاص كبرتو بس

محدش فاهم ايه اللي بينهم مهما يحاولو يتدخلو 

هوا بيحبها كده وعايزها كده

وهيا مش عايزه منه اكتر من اللي بيعمله
اصلهم بيحبو بعض اوي 

بيتخانقو كتير جدا ولاسباب تافهه 

وكل مره كانت بتدعي انهم يبعدو عن بعض 

يمكن يرتاحو شويه ويرجعو بشوق من جديد

بس لما بعد شويه

مكنتش تعرف انه هايوحشها كده 

وانها هاتندم علي كل لحظه زعل حصلت بينهم

كل يوم تنوي انه لما يجي هاتعامله احسن من الاول 

وهاتحبه اكتر اكتر وهاترضيه بكل الطرق

وهوا نفس الحكايه مش قادر يعيش من غيرها 

رغم انه فكر انه هايرتاح من زنها شويه

بس في بعدها بيعد الساعات عشان يرجع لحضنها من تاني 

اصلهم بيحبو بعض اوي 

كل مره كان بيجي البيت يلاقيها مخنوقه 

ومعيطه ويسألها مالك 

متردش او تقوله مفيش 

كان بيضايق اوي منها 

بس اللي مكنش قادر يفهمه

ان كل اللي محتجاه منه حضن بس

وهي هاتهدي وهتنسي كل اللي فيها

لما قالتله كده بقت بتتصنع البكا  عشان بس يحاوطها بايده

وبضمها في حضنه 

وبقي هو دايما يسألها مفيش حاجه مزعلاكي :))

اصلهم بيحبو بعض اوي