22-9 من تاني

22-9

من تاني

مش هتكلم عن اليوم عشان انا وانت عارفين مناسبته بينا كويس

بس هقولك ان كل يوم بيعدي علينا بحبك فيه اكتر واكتر

عشان من قبل مااعرفك وكنت انت الحد اللي بتمناه

عشان من يوم ماعرفتك وانا معتمده عليك في كل حاجه وماشيه وراك مغمضه

لاني واثقه ان عمرك ماهتغلط في طريقنا

عشان عمرك ماهربت من مسئوليه او ضغط عليك بالعكس دايما بتشيل ولوحدك

عشان كل مابتضيق الدنيا في عيني بفتكر دايما كلامك ان مفيش مشكله في الدنيا ملهاش حل

وان دايما مع كل حاجه صعبه بيبقي في مفتاح ليها

عشان بحس انك حابب كل حاجه فيا حتي لو مضايقاك

عشان دايما بحس اني ضعيفه اوي معاك وان قوتي دايما باخدها منك انت

عشان بحس انك الوحيد في الدنيا اللي قادر تحتويني

عشان بحس ان معاك مالكه كل الدنيا

عشان من يوم ماتجوزتك وبالرغم ان حصل بينا اكتر من مشكله

وكل خناقه بقول اني مبقتش بحبك ولما نتصالح

بقول علي نفسي عبيطه اوي لاني عمري مابطلت احبك

وبالرغم ان في اوقات كتير عدت علينا حسيت فيها ان من جوايا مضايقه منك

بس عمري ماحسيت ان في حاجه ناقصاني او محتجاها طول ماانت معايا

وعمري ماحسيت انك مقصر في حقي

عشان لما بفرح معاك او بسببك بفرح اوي

ولما بزعل منك بزعل اوي اوي

عشان بحس بالامان اوي وانا ماشيه وايدي متشعلقه فيك

عشان بحس بالراحه في حضنك اوي حتي لو مقموصه منك

عشان يوم ماعرفتك اتأكدت ان معايا راجل اوي

عشان تاني ذكري في 22-9

كنت لابسه في ايدي دبلتك

عشان تالت ذكري تعدي علينا في 22-9

كنت في بيتك ومستنيين اول بيبي لينا سوا

وعشان عمرك ماخلفت وعد معايا

بالعكس معاك بلاقي اكتر من اللي بتمناه

وعشان كده بحبك اكتر من اوي