معرفش ازاي 8 شهور الا اسبوعين
عدوا عليا بسرعه اوي كده
بالرغم ان كل ماابقي تعبانه ادعي ربنا يهون الوقت اوي
دلوقتي متبقاش غير كم اسبوع بس وتيجي
تنوري كل حاجه في حياتنا
وتملي علينا الوقت والمكان
بس كل مابتقرب الايام كل مابخاف اوي
وبترعب من فكره ان ابقي أم
اصل انا مش متخيله نفسي لدلوقتي اني ممكن ابقي أم
وان يبقي في حد متعلق في رقبتي ويقولي ياماما
غريبه اوي زي ماكنت مستغربه اول ماعرفت اني حامل
رغم اني مكنتش عاوزه حمل في الاول كده
واعيش حياتي من غير مسئوليه كبيره في الاول فتره وبعدين اتهيأ نفسيا لوجودك
بس اول مره شوفتك علي السونار رغم انك مكنتيش باينه خالص
والدكتور بيقولنا هيا النقطه دي
وباباكي شايفه في عنيه فرحه مشوفتهاش قبل كده
وقعدنا طول اليوم نتكلم عنك وعن النقطه اللي مش باينه اصلا
حبيتك اوي من قبل مااشوفك ومن قبل حتي ماتحدد ملامحك
ورغم اني محستش بيكي جوايا الا بعد كم شهر
وانتي بتتنططي وعماله تتحركي يمين وشمال ومش مريحه نفسك
ولامريحاني بس بقيت بموت من الفرحه وانتي شغاله كده
وبتضايق اوي وبشتكي لو محستكيش في دقيقه جوايا
ورغم اني لحد دلوقتي مش قادره احددلك ملامح مهما حاولت ارسمك جوايا
بس اللي متأكده منه انك حتي لما تيجي الدنيا هتفضلي بردو جوه قلبي زي ماانتي
كفايه انك حته مني ومنه مربوطه بينا احنا الاتنين
صغيرتي
بحبك من قبل مااشوفك و
مستنياكي بفارغ الصبر
11 comments:
ربنا يكرمك ويتمملك علي خير يا رب
شكرا ع زيارتك ليا
:))
احساس الامومة والمسؤلية اكيد جميل
ربنا يقويكي
بس جميل اوي لما بتشوفي حتة منك وشبهك بتكبر قدامك وبتهتمي بيها زي ما تكوني بتبني حاجة بايديكي طوبة طوبة
:)
اللللللللله
بجد ما شاء الله اصلا
ربنا يكملك على خير
وتكون بنوتة زى القمر كده
ابقى قوليلى هتسميها ايه ;)
احساس تحفه يا ميويا
وانتى عبرتى عنه بكلام مفيش بعده كلام
ربنا يكملك على خير يا حبيبتى
وتقومى بالسلامه ان شاء الله
وتجيبى اجمل بنوته فى الدنيا :)
ميويا بتفكرينى باختى
هى اسمها علي اسمك اصلا
وربنا رزقها بكريم في شهر رمضان الحمد الله انا دايما كنت ببصلها ومش مصدقه انها حامل وهى كذلك وحتى الان مش متخيلين عادى يعنى
كلامك حلو اوى ربنا يخلي النونه ليكى وتطلع قمر وعسوله هى هتجيب من برة يعنى :):)
اة واكيد اكيد اتمنالك ولاده سهله وحلوة ان شاء الله
نهر الحب
منوراني ويارب دايما
ربنا يخليكي ويتقبل منك :)
فعلا احساس الامومه دي طلع حاجه تانيه خالص غير اللي كنا متخيلنيه طول عمرنا
ربنا يقدرنا ويكرمنا في تربيتها
ميس لوزا
يارب يسمع منك
وحاضر هيا تيجي بس
واقولك اسمها وصورتها كمان :)
دودو
ربنا يخليكي يادودو
عقبال جوازك بقي
ونفرح بعيالك ان شاءالله
رونا
ربنا يكرمها فيه ويخليهولها
وعقبالك ولادك انتي كمان ان شاءالله
ويارب تبقي ولاده سهله يااارب :(
الف مبروووووووووك مقدما
ربنا يكرمك يارب
^_^
روعة،،،مي
هو أنا عايز اعرفحاجهوحده بس :)
انتي ليه كلامك حلو قوي كده وبيلمس مشاعر و احساس و وجدان البني آدم كده :)
بجد ميرسي على الاحساس الرائع الي بتنقليهولنا ده :)
ربنا يكملك على خير وتقومي بالسلامه ... بس ليا عندك طلب :)
ابقي سميها "منة" ... ماشي :D
Post a Comment