بتبدي بصباح وضحكه من عين جني
بتملي قلبي بفرحه
بتخليني قادره اكمل اليوم وانا عارفه التعب اللي فيه
ريحه القرفه
واعواد القرفه بالذات
في مج لبن بتعمل حاله من النشوه جوه روحي اوي
طعم الشيكولاته اللي بتدوب بسرعه
وتاكلها حته بحته صغيره عشان مش تخلص بسرعه
بتخلي اي حد مبسوط ومنتشي اوي بيها
بس بتفرق معايا اوي لما تكون انت اللي جايبهالي
الدولفين
كائن عجيب اوي
بتبصله تحس انك عايز تضحك
بتحس انك مبسوط وان في حاجه مفرحاك
معرفش ليه دايما
بحس ان في ارتباط بينه وبين الاطفال
يمكن عشان بحسه شبه الاطفال
المهم اني ببقي مبسوطه وزي الاطفال
وانا بشوف صوره او بتفرج علي عرض ليه
دعاء جدتي لما بتكلمني
"ربنا ينصفك نصفه الكل يستعجب فيها"
ياه الدعوه دي
طول عمري بسمعها منها
ولما اروح ازورها ومش بتدعي بيها بالذات
بطلبها منها غصبا كده
رسايلك علي موبايلي
واللي لسه محتفظه بيها
من قبل خطوبتنا وجوازنا
دنيا تانيه :)
صحباتي اللي معرفش حاجه تقريبا عنهم
واللي الجواز والغربه أخد كل واحده في طريق
بفرح اوي لما يجي في بالي
او في بال واحده فيهم
مكلمتهاش من سنين
واتصل بيها او العكس
او بلاقيها صدفه علي الفيس بوك
ببقي مبسوطه اوي
وبحس اني عملت حاجه فرقت معايا في يومي
لما بتبين اهتمامك
بحاجه عملتها وبتحسسني انك راضي اوي عنها
مع انه قليل بس برتاح لما بيوصلني احساس منك بالرضا
ببقي في قمه سعادتي
وانا بشتري لبس لجني فستان
او حتي بجيبهالك توكه
او اي حاجه تخصها
ببقي حسه بفرحه متتوصفش
ببقي فرحانه اوي
وانا قادره اخرج حاجه جوايا
مضايقاني او مفرحاني او محبطاني
بورقه وقلم
9 comments:
بصي بقى
أنا كنت هعلق على كل خاطرة لوحدها ، بس صراحة مالقتش كلام أوصفلك بيه إحساسي بكل خاطرة لوحدها
:-))
سلمت يداكي ياقمر
لأ بجد طريقة سردك لكل حاجة لوحدها جميل جدا جدا جدا
تحياتي لكِ
تقبلي مروري
ايه الجمال ده (,'')
حبيتها اوي اوي بجد :)
صباح الغاردينيا
:)
بجد ابتسمت عشان كل سطر هنا احساس دافي وعفوي ومن القلب
ربنا يخليلك جنى ويفرحك بيها وامانة بوسيها بوسة خاصة من ريمو صاحبتها :)"
؛؛
؛
لروحك عبق الغاردينيا
كانت هنا
Reemaas
جنى دى سكرة ربنا يخليهالك يا ميوووش وتعيشي وتجيبيلها وتفرحي .. وتفرحي بيها كمان ^_^
ويارب يهديكي انتى واحمد لبعض ودايما تكونوا راضيين عن بعض ^^, ويسعدك فى كل خطوة :)
والدولفين ده حكااااية ده عسووول اوي بجد بحبه اوي .. وكان نفسي لو كنت املك دولفيين :D
bent pasha
الاجمل مرورك وزيارتك
منوراني دايما :)
shaza
انتي الاحلي ياسكره
وهيا كمان بتحبك♥
ريماس
يارب دايما متبسمه :)
وبوستك خلاص وصلتها
منوراني ياريماس دائما
nona
يااوختي لو كان الدولفين ينفع يعيش معانا
كنت جبته في اوضه جني هههههه
منوراني ياحنون
وربنا يخليكي ويسمع منك
وعقبال مانفرح بيكي ياجميل♥
Post a Comment