امتنان

شكرا لأنك منحتني الفخر والرضا

بما أنا عليه.

40

لسه بس 40 يوم

يارب عديهم علي خير :)))

وابعد عنا اي حاجه وحشه

خلاص بقيت حرمك

بقالي يومين بفتح وعايزه اكتب

بس مش عارفه اعبر بجد عن اللي جوه

يمكن لحد دلوقتي مش مصدقه ان انت خلاص بقيت جوزي

وان احنا خلاص بنقفل المراحل النهائيه

عشان هنبتدي حياتنا في بيتنا سوا

وان خلاص باقي كم اسبوع وهبقي في بيتك وبتاعتك للابد

اصدق ازاي وانا كنت لحد اسبوع فات

ببص لدبلتك ومستغربه ان احنا اتخطبنا

امممم عارفه ان انا بقالي اسبوع رخمه اوي معاك

وبتقولي انتي بارده ليه

بس انا مكنتش في برود انا كنت متنحه اوي

ومستغربه اوي ان الوقت بينا جري وان احنا خلاص هنتجوز

كان عندي اذبهلال اوي وحسه ان داخله مرحله جديده

خايفه منها ومش قدها لحد النهارده بس

واكتر من حد بيقولي احمد خلاص مبقاش خطيبك

احمد بقي جوزك وشغل الهبل والدلع والخصام ده بطليه بقي

وقاعده في وسط كتير عمالين ينصحوني اني ابقي عاقله

واني اتوصي بيك

مع اني مش فاهمه لحد دلوقتي ازاي حد يقدر يوصيني عليك

وانت حته مني

ومتشال جوه قلبي وروحي وعيني

مش قادرين يفهمو ان انت كل املي وكل حياتي ودنيتي

وان مش عايزه من الدنيا كلها غيرك انت اصلا

ربنا يجعلني ليك زوجه صالحه ويجعلك ليا زوج صالح

ويرزقنا سوا السعاده والتوفيق والذريه الصالحه

يارب يبارك لينا ويبعد عننا اي حاجه وحشه

ويملي حياتنا سوا حب وخير ورضا

بحبك اوي ياجوزي :))

♥ وحــــدكــــ تغنيني عن الدنيــا ♥

22/9

فاكر لما قولتلي

انه يوم ميلادنا :)

اهم تواريخ حياتي علي الاطلاق

وبعتبره تاريخ ميلادي

عارف ليه عشان

معاك

شوفت كل حاجه في الدنيا بشكل جديد

وكأني مكنتش عايشه كل اللي فات ده

معاك

بعيش كل حاجه في حياتي

بطعم جديد طعم حلو اوي مجربتوش قبل كده

معاك

اتمنيت كل يوم من عمري راح

يرجع تاني عشان اعيشه معاك انت

معاك

عرفت يعني ايه

ب ح ب ك

يعني ايه بتوحشني وانت معايا

يعني ايه ابقي ملهوفه عليك لو بعدت عن عيني ثانيه

معاك

عرفت يعني ايه ضحك

يعني ايه قلبي يبقي فرحان اوي

عشان انت جواه

يعني ايه أمان

يعني ايه ابقي مطمنه وانا برمي كل همومي عليك

معاك

كل حاجه مش مترتبه

ومش متخططه ولابنمشي بقلم ومسطره

حتي مشاعري ليك :)

معاك

بشكر ربنا اوي لانه اختارك ليا نصيب وقدر

كل سنه وانت حبيبي وخطيبي

وكل حياتي

كل سنه وانت ليا وانا ليك

بحبك اوي

مما قرأت

تـــرى لو اعترفت لك أني احتاجك كـ الهواء ..

~

فهل ستـــخـــنـــقـــني ..؟

لـــ شهرزاد الخــليج ...

عيدك انت

*وَحدك تمنحني الأعياد

عرفت ليه كانت الدنيا مضلمه

وان حبك لوحده بيخلي الدنيا ملونه

بدال سوادها

.كل سنه وانا دايما جواك

.كل سنه وانت دايما معايا

*ساره درويش*

مش سعيد

هوا العيد ماله كده

مش جي سعيد

ولاجي بفرحه

ليه سكره ماسخ

وملوش طعم

ولااحنا اللي مبقيناش

قادرين نستوعب اي حاجه تفرحنا

انت وانا

عارف من يوم ماعرفتك

وانا كل مابتضيق عليا الدنيا

بلاقي معاك البراح

دلوقتي مش عارفه هوا راح فين البراح ده

وليه معدتش حساه

من اول ماعرفتك

مع اني كنت خايفه اوي احبك

او اسلمك قلبي وبرغم كده

كنت بحب اوي احس اني بنتك

واني واخده كل حنيتك واهتمامك

ومبتدورش علي مقابل للي بتديه

من يوم ماتخطبنا

ولبست دبلتك كنت ببصلها

وحسه اني شايله حاجه كبيره اوي

كنت خايفه مكونش قدها

بقيت بحس اني مسئوله اوي منك

وانك الوحيد في الدنيا اللي ليك الحق

انك تعرف وتتدخل في كل تفاصيلي

وكنت بفرح اوي لما تسالني علي حاجات بسيطه اوي

بس كانت بتفرق معايا اوي

مهما كان بيوصلك اني متضايقه

بس فعلا كنت بفرح اوي

كنت بستمتع اوي بكلمه حاضر

مع اني مكنتش بحب حد يأمرني بحاجه

بس كنت بستلذ اوي طاعتك

واني اعملك اللي انت عايزه

حتي لو مش راضيه عنه

بس كنت بفرح اوي برضاك

مابين سنه فاتت لحد دلوقتي

وانا حبي ليك بيكبر اضعاف اضعاف

مبقتش بخاف احبك بالعكس

بقيت متأكده انك سندي وضهري

وحمايتي وكل اللي في الدنيا

كنت وكنت وكنت

معرفش ليه حاجات كتير اتغيرت

ومعدتش لاقياها

رمضان جانا

اهلا رمضان

الهي

امنحني القوه

لأجعله اسعد خلقك بي.

وامنحني الصبر

لأكون اسعد خلقك به.

امتنان

الحمدلله

شكرا يارب ...

حداد

انا ماليش في المشاركات السياسيه

بس اعتقد ان الموضوع عدي كونه مجرد كلام في سياسه

وبقي قضيه شعب.

عنك

بشكرك لانك حبيبى ...لانك معايا

مش كتير بكتب عنك هنا

مش عارفه ليه مع انك الوحيد في حياتي

اللي مفروض يبقي ليه مساحه كبيره اوي

في الكلام عنه

بس كل مااجي اكتب عنك

بلاقي صعب اوي

مبلاقيش كلام يوصفك

ولااي لغه في العالم بتساعدني اني اقول فيك اللي عايزاه

يمكن عشان انت اكبر من كل الكلام

واحلي من كل ابجديات كل اللغات

يمكن دخولك في حياتي كان صدفه

ولسه مش مستوعبه لحد دلوقتي ان في حد زيك كده

موجود جواها

عارف شعاع النور لما بيدخل مكان

بيعكس ضيه في كل حاجه حواليه

انت عملت نور في كل حاجه في دنيتي

حقيقي انا فرحانه بيك اوي

وبحسد نفسي عليك

وبشكر ربنا اوي عليك

وبتمني ربنا يسعدنا سوا اكتر مابحلم

مبروك عليا انت

وفعلا

قلب الحياة مليان حاجات و بتفرَّح

........

بحبك بعدد نجوم السما

النبته الطيبه

الطيبون هم منح وعطايا الله وقت المحن

فهم دائما هدايا القدر الينا

فهم كالنبته الطيبه

يحولون دموعنا لابتسامات

يبعثرون الحزن لاشلاء لانعاود لملمتها

بل يشكلون منها افراح

يزرعون في قلوبنا زهور بيضاء

نظل مستمتعين برحيقها طول العمر

حتي لو فقدناهم.

empty

حته فاضيه

في حياتي

في يومي

في قلبي

في روحي

حته فاضيه في كل حاجه حواليا

بقالي كتير مش عارفه املاها

حته فاضيه مفيش حاجه عايزه تملاها

:(

قريب وبعيد

.

كلما اقتربنا اكتر ... زادنا القرب بعدا

في البعد حبه شوق كثير جفا

ويمر العمر

وبعد عامها الثالث والعشرين

تدرك حينها ان قطار الحياه يسير ولايتوقف

ولاينتظر قدوم ولارحيل احدهم

وتظل هي وحدها محطه ثابته يأتون اليها ويرحلون

لتكتشف ان الأغلبيه منهم ان لم يكن جميعهم ليسوا فقط سوي عابرين

فعندما تكون العلاقات هشه لايزيدها مرور العمر الا هشاشه

حتي لم تعد تشعر هي بتسربهم من حياتها

او حتي بوجودهم يوما ما ..

قهر ....

ولأنها فقدت ماتملكه من اجنحة .... فلم تعد تقوي علي محاولات الطيران من جديد. .

همسة

أحبك لأنني عرفت معك شيئا جديدا غريبا عني اسمه الفرح


*****

غاده السمان

ثقب

ولأنهم امتلكونا بحبهم

ف برحيلهم يتركون ورائهم دوما ثقب في القلب ...

ولأني أحبك

ولأني أحبك
اسرتني
ملكتني

ولأني أحبك
احببت نفسي معاك
احببت الحياه بك

ولأني أحبك
يقهرني البعد عنك
يقتلني خوف فراقك


ولأني أحبك
احتويني
امتزج بي
وليكن قلبك عالمي
ولتكن انت دنياي


ولأني أحبك
لن اري سواك
لن اعشق غيرك

ولأني أحبك
فدعني
احبك بطريقتي
كما يحلو لي
بصمتي
بكلامي
بابجديات حروفي
بهمساتي

ولأني أحبك
فدعني
اشتاقك
احتاجك
اعشقك
ارغبك
اجتاحك

ولأني أحبك
فسأظل علي عهدي لك
سانتظرك
وانتظرك
وانتظرك


ولأني أحبك
فكن انت قدري

ولأني أحبك
فكل يوم انت لي الحب



اليك يافرحة العمر

هيعيش دايما قلبي بيهواك ولايمكن حاجه هتبعده*

انغام*

بعض من أنا

اكثر مانحتار فيه ان نكتشف بعضاا من داخلنا ولذلك نحاول لعلنا نكتشف انفسنا من بين السطور فانفسنا دائمه المفاجئات تخفي شيئا وتظهر شيئا
فأنا تلك المهزوزه التي لايعجبها في نفسها شيء ويتهمها الجميع بقله ثقتها في نفسها ومع ذلك لاتحاول تغيير ذلك.

أنا تلك العنيده التي تدفع نفسها وبكامل وعيها في مواقف تعرف نهايتها السيئه حتي لاتشعر بالخذلان والقهر من احد.

أنا هي المزاجيه التي لاتستطيع ان تستقر علي حال فلا تعرف ماذا ستكون بعد قليل فلا ثوابت عندي ولاحقائق لدي.

أنا تلك التي تنزوي في ركن بعيد تبكي علي كل شيء واي شيء بعيد عن اعين الناس.

أنا هي التي تستطيع ان تكتب وتكتب لايام متواصله ولاتستطيع ان تتحدث ولو عده دقائق مستمره.

أنا من تشعر فيها احيانا انها كتله من اليأس والاحباط وتجدها هي من تمنحك الأمل وتدفعك لتقاتل من اجل البقاء.

أنا من تثق في كل الناس ويسهل خداعها مع انها تعرف الطيب من الخبيث.

أنا تلك المندفعه لتقذف باغبي الكلمات وبعد قليل تحاول الاعتذار عنها ولاتستطيع ان تتوقف عن تلك العادتين الحماقه
والاعتذار.
أنا التي تشك في كل شيء ويملأها الخوف من كل مجهول.

أنا تلك التي بكلمه قد تتهاوي كبناء واحيانا لايؤثر فيها كلاما بثقل الجبال.
ومازال في النفس بقيه ...

new born

ولأننا لن نمتلك يوما القدره علي تغيير ماقد مضي..
فلنحرق اوراق الماضي
ولتكن لي انت كل الأزمنة ..

محاوله جديده

غريبه اوي ان 4شهور يعدو من غير ماافكر حتي اكتب كلمه
ولافي وداع عام واستقبال سنه جديده
كل الناس زي كل سنه
وكالعاده تأمل وتتمني انها تبقي سنه كلها خير
كنت دايما بقول مفيش كتابه عشان مفيش حاجه يتكتب فيها او عنها
عشان جوه فاضي
الغريبه ان ال4 شهور كانو مليانين اوي
وحاجات كتير جوايا تستحق انها يتكتب عنها
بس معرفش ليه مكنتش عايزه اقول حاجه
اللي جوه مش عايز يخرج
يمكن خايفه اقوله
يمكن مش عارفه اعبر عنه
او او او
المهم ان جوايا مليان اوي
مكنتش بفتح هنا ونسيت هنا
وقولت هكتب في مكان تاني
معرفتش اكتب هنا ولاهناك
ومعرفش ليه استسلمت لاغراء أيه اني ارجع تاني
مع اني واثقه اني مش هعرف اقول حاجه
مع ان 2009 كانت مليانه بكتير اوي
وحاجات جديده اوي
منها اللي زعلني ومنها اللي فرحني ومنها اللي علمني ووو
وناس راحت وناس جت وناس قصرت معاها
وناس وناس وناس
مش متاكده اني ممكن اجي تاني

بس اللي متأكده منه
ان جوايا خايف اوي